អ្នកគ្រូ អឿ មុន្នី ដាក់ពាក្យបន្តជាគ្រូបង្រៀនជាប់កិច្ចសន្យា តែត្រូវបានមន្ទីរអប់រំបដិសេដដោយថាលើសអាយុ
បន្ទាយមានជ័យ៖ អ្នកគ្រូ អឿ មុន្នី អាយុ ៥៧ឆ្នាំ បានដាក់ពាក្យបន្តធ្វើជាគ្រូបង្រៀននៅសាលាបឋមសិក្សាសុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ ប៉ុន្តែត្រូវបានមន្ទីរអប់រំ យុវជន និងកីឡា បដិសេដដោយថាលើសអាយុកំណត់។ នេះជាការបំភ្លឺរបស់មន្ទីរអប់រំខេត្តបន្ទាយមានជ័យឆ្លើយតបសារបង្ហោះលើបណ្តោញសង្គមហ្វេសប៊ុក ដោយអ្នកគ្រូ អឿ មុន្នី ដែលបង្ហាញការមិនពេញចិត្ត។
អ្នកគ្រូ អឿ មុន្នី បានស្ម័គ្រចិត្តធ្វើជាគ្រូបង្រៀនជាប់កិច្ចសន្យានៅសាលាបឋមសិក្សាសុខសាន្ត សង្កាត់និមិត្ត ក្រុងប៉ោយប៉ែត អស់រយៈពេល ១៧ឆ្នាំមកហើយ តាំងពីប្រាក់ខែ ១៣ម៉ឺនរៀល រហូតដល់ ១លាន ១សែន ២ម៉ឺនរៀល។
ពាក់ព័ន្ធនឹងការចុះផ្សាយខាងលើនេះ មន្ទីរអប់រំ យុវជន និងកីឡាខេត្ត បានបំភ្លឺថា ក្រសួងអប់រំមិនមានគោលការណ៍បន្តឱ្យគ្រូបង្រៀនជាប់កិច្ចសន្យាដែលមានអាយុលើសពី ៤០ឆ្នាំឡើយ។ យោងតាមសេចក្តីប្រកាសស្តីពីការជ្រើសរើសគ្រូបង្រៀនជាប់កិច្ចសន្យាចំណេះទូទៅ បានកំណត់បេក្ខជនដែលមានអាយុចាប់ពី១៨ឆ្នាំ ដល់៤០ឆ្នាំ ដោយគិតចាប់ពីថ្ងៃទី១២ ខែធ្នូ ឆ្នាំ២០២៣។
មន្ទីរអប់រំ យុវជន និងកីឡាខេត្តបន្ទាយមានជ័យ អះអាងករណីចំពោះអ្នកគ្រូ អឿ មុន្នី ដែលមានអាយុលើសច្រើន ជាហេតុធ្វើឱ្យការិយាល័យអប់រំ នៃរដ្ឋបាលក្រុងពុំទទួលពាក្យស្នើសុំធ្វើជាគ្រូបង្រៀនជាប់កិច្ចសន្យាបន្តទៅទៀត៕